沙士疑案影響下，恒指早段急挫120點，但午後逐步收復失地，倒升7點；國企指數亦由跌132點倒升97點。暫時咪太開心住，港股昨日跌唔落，可能因為今日期指結算，有人要頂住，後市如何走法，結算後方見真章。
大市雖不明朗，實力股確應逢低吸納。倉內隻富豪（078），早段被質落15.8仙，但好快掉頭殺上。正如早幾日所講，富豪在17.5至18.5仙密集區有阻力，故此喺17.6仙先沽1球食胡，希望低啲撈番，目標價仍看20至22仙。
遠東發展（035）復牌，趙飛雲按計劃於1.39元入貨，初步目標睇1.6元以上。富豪同遠展都有酒店，均受惠於自由行，但佢哋嘅地產項目同資產大折讓，就更值得憧憬，尤其係遠展，他日成為基金股，折讓必然大幅收窄。
另一隻值得逢低吸納嘅好股係冠軍（092），PE僅5倍，資產淨值每股約4元，現價1.58元，折讓達6成，十分超值。冠軍日前宣布送認股證，至少每5股送1份窩輪。粗略計算，這批窩輪每份值40至45仙，即每股得益8至9仙。送輪消息公布後，冠軍股價不升反跌，未有反映此一利好因素。睇番張圖，冠軍9RSI同隨機指數均出現利好之底背馳，形態上則屬於下降楔形，若突破1.63元阻力，即開展新升浪。
趙飛雲