吳剛師傅早前向無綫自薦捉鱷魚做善事遭拒絕後，嚟緊喺無綫節目《慈善星輝仁濟夜》會表演人肉拉巴士，重有人已經認捐一百萬，噚日吳剛喺記者會上大玩碎磚，令到現場嘉賓許志安、梁漢文、陳冠希等睇到拍爛手掌。
吳剛講到興起時重話自己練咗秘密武器，係少林功夫「鐵布衫」，可以用何B仔舉重，吳剛話：「即係將身體重要部位練到鋼鐵般堅硬，我見啲師兄練習時係咁俾人用力踢都冇事，不過唔係百分百成功，尤其見到低胸迷你裙嘅性感女仔就會影響到！」
吳剛又說：「練習時要戒色，所以我都有將重要部位買重保險，曾經試過受傷㗎，會好痛苦，之後要浸藥酒。」吳剛重即場示範紮馬浸藥酒姿勢，咁都諗到，抵佢博到搶鏡。
另一驚險項目係由許志安用鐵鎚擊爆韓君婷心口上點着火嘅冰，不過安仔睇吳剛師傅嘅碎磚後都話：「真係服咗佢，師傅係男版開心果，不過表演前佢應該先着羽絨，驚佢冷親。」
蕭亞軒（Elva）嘅新專輯《第五大道》會喺今日發行，佢日前去咗台灣知名夜店MoshiMoshi拍新歌MV，嗰日天氣好凍，蕭亞軒拍嗰陣只係着住好薄嘅衫，不過佢就好似完全唔覺凍咁，同三十幾個舞蹈員狂歌熱舞，跳到咁熱，唔怪得之唔覺凍啦！
盧巧音噚日到港台出席活動，佢話前晚喺新城頒獎禮奪得兩個獎非常滿意，不過鍾意港台嘅頒獎方式多啲，佢話：「因為港台有畀歌手喺事前綵排，就算有冇獎都好，都應該有綵排囉，因為前晚成個騷都有少少混亂，我覺得自己唱得唔係咁好。」盧巧音咁直接話鍾意港台多過新城，唔通佢唔驚會俾新城封殺？
葉蒨文（沙麗）前日喺台灣宣傳新碟，老公林子祥（阿Lam）個仔Alex半夜唔舒服，沙麗同阿Lam就嗱嗱臨陪Alex去醫院度睇急症，沙麗一直伴喺Alex身邊照顧佢同安慰佢，而阿Lam就不時走出急症室外唞唞氣。馮仁昭覺得沙麗都幾錫阿Lam個仔，好有做人媽咪嘅風範呀！
