XBOX遊戲向來西洋味較重，對煲慣日本遊戲嘅香港機迷，和風味十足嘅《O.TO.GI~御伽~》可能更啱口味，新一集嘅《O.TO.GI~百鬼討伐繪卷~》剛剛推出，繼續大吹和風，除咗仍然由上集嘅源賴光擔大旗外，今集更加入5個新角色，各自都有獨當一面嘅能力同戰力，打起嚟特別和味！
記者：許福合
有玩過上集嘅機迷，印象最深嘅當然係由場景到角色都有極強烈日本色彩，今集繼續努力除魔伏妖，一共有6個角色供機迷選擇，由陰陽師、戰士到天王都有，個個都有不同降魔能力，衣着獨特同時又具有日本風味，其中最有趣都要數安倍睛明，戴上一頂高帽，一身白袍，手揸摺扇，十足十漫畫《棋魂》裏面嘅佐為，不過今次就唔係玩圍棋，改以陰陽師身份除魔。
遊戲類型：動作
對應機種：XBOX
遊玩人數：1人
開發商：FROMSOFTWRAE
支援：杜比5.1音效＋高解像畫面
行貨售價：$399（包含一、二集）
若然只加入新角色，當然未夠吸引力，新一集喺攻擊方面就有唔少新招數，走近敵人可以使用投擲招式，不過呢招要埋身肉搏，群戰就唔化算，大多數戰鬥以連續技最好用，一來容易甩身，二來升級速度都較快！另外戰鬥時，因為以3D畫面打鬥，為免走失敵人，玩家可鎖定其中一個作視點中心，不過就要小心被人從後偷襲。喜歡動作遊戲必定愛玩新增嘅「白鬼討伐」模式，要喺限定時間內單獨擊倒一群一群妖魔或破壞全部建築物，場面震撼，玩起嚟非常緊張，手心出汗，分分鐘比正場還要好玩！
6個角色都各自有唔同嘅攻擊能力，主要使用巫術同符咒，各有唔同效果，可以召喚龍、鳳凰同蝴蝶出嚟殺敵，另外亦設有武器系統，除咗經戰鬥獲得刀劍外，亦可憑金錢買到武器及符咒等物品，既可提升戰鬥力，更因為部份故事需要玩家先獲得指定武器或道具先有機會破關，不過呢點都唔係最難之處，因為遊戲內有唔少隱藏秘道，當中有機會得到把靚劍或魔法，只要肯花時間搵搵總會有收穫。
XBOXHK
香港客戶服務專線：800964215
官方網址：
