港府大公關民政事務局常任秘書長李麗娟早前應承同班沙士病人家屬慶祝聖誕，重話有個神秘嘉賓到場贈興，謎底噚日揭盅，契媽同衞生署前署長、𠵱家去咗世衞打工嘅陳馮富珍，親自帶團大大細細成四十人嘅沙士病人家屬團去數碼港玩咗大半日，兩位阿姐出馬，加上醫管局高層馮康同梁乃光醫生同行，數碼港個行政總裁楊偉雄好識做擔任領隊，帶成團人遊勻數碼港三期建築。
契媽則話班大人細路最興奮係玩互動電腦，全場年紀最細只有一歲多啲嗰位小妹妹更係玩到唔捨得走，有位媽咪重話要的起心肝學電腦，否則畀啲細路睇小喎。見到媽咪咁有上進心，契媽即刻話要諗吓搞個婦女電腦班。
陳馮富珍返香港幾日過聖誕就飛返日內瓦，不過下個月又會返歸，因為要上立法會出席調查沙士聆訊，屆時隨時俾班議員砌。
（圖）陳馮富珍（後右三）同契媽（後右二）一齊帶班沙士病人家屬遊數碼港、玩電腦。
傳真︰2623-9278
電郵︰