今年聖誕節，除咗GameShow有大量未出街新Game畀你玩之外，場外廠商亦最後衝刺，推出大量新Game應節，好似今個星期三大主機加埋GBA有成十三四款新作，真係一定唔會悶。打頭陣嘅PS2《SNKVSCAPACOMCHAOS》街機$5局就反應麻麻，移植去家用機$400任玩就唔同講法。翻炒《MetalGear》Feel嘅《SPYFICTION》由於上個星期尾已經推出，坊間反應都算OK，市價約$380。至於街機同《頭文字D》一樣咁Hit嘅《BATTLEGEAR3》，水貨限定版上星期六已經抵港，雖然加上網上對戰元素，但索價成$500就令好多人寧願等行貨。至於本周至熱賣嘅就梗係GT版白色PS2喇，淨睇亞洲遊戲展啲人大排長龍等買機，就知道白色威力有幾掂。
上集有唔錯評價嘅爽快動作遊戲《御伽》，今個星期推出最新一集，重賣大包一盒二碟，除主遊戲外重附送第一集嘅國際版，行貨定價$399。XBOX版《SonicHeroes》亦鐵定會有行貨，今次雖然三部主機都會同時推出，不過論定價同高質素，XBOX版明顯較抵買。而SEGA《GTOnline》截稿前仍未見街，上次《PGR2》上網對戰大受好評，相信今次都唔會差。