信和旗下商場活動一浪接一浪，聖誕節之後又有新搞作，屯門黃金海岸商場會喺明晚除夕夜，舉行「黃金飄雪倒數夜」，發展商話，到時會有置身雪地嘅感覺。聽落係咪覺得好好玩呢？新界友唔使出市區先至有得參加倒數派對嘞。
呢個活動當然唔少得藝人表演啦，嘉賓有趙頌茹、李逸朗同新晉歌手周國賢等。當晚有得玩之餘，又有明星藝人睇，認真熱鬧。
同場重有「送舊迎新喜閱讀捐贈叢書活動」，將收集到嘅舊書送畀有需要嘅小朋友。
大發展商涉足嘅業務廣泛，有時可以借助姊妹公司之力，幫手搵客或宣傳。例如長和系嘅天水圍嘉湖海逸酒店，推出優惠月租計劃，蘭西發現，百佳超級市場內擺放咗優惠計劃嘅宣傳單張，咁就可以慳番唔少廣告費。咁遲吓唔知係咪連樓書都擺喺度畀人攞呢？
豪宅持續熱賣，不時都聽到有名人入市，美容界響噹噹嘅蒙妮坦董事長鄭明明，再度入市買樓，以八百九十萬，再買多一個何文田君頤峰單位，係二座二十三樓B室，一千四百二十三方呎，呎價有成六千二百五十四蚊。佢之前已經用咗逾三千萬，買咗君頤峰二座二十三樓A室同三十樓相連單位。今次入市，唔知係咪有意同隔籬個單位打通做相連單位，將單位面積擴大至三千二百一十六呎。
另外，金牌經理人陳自強，啱啱用一千二百四十萬，買入西貢銀線灣海天灣十號屋，以屋宇面積二千六百六十八呎計，每方呎四千六百四十八蚊。陳自強早排睇過薄扶林貝沙灣，最終揀咗海天灣呢個單位。
蘭西
電郵地址：