重有唔到48小時，就踏入2004年，可能有唔少香港人正準備歡度除夕夜同新年嘅到臨，惟呢個時刻卻有不少車行中人，卻忙碌得不可開交，正籌備新車到港嘅事宜噃！
屈指一算，單係歐洲車方面，相信嚟緊2004年上半年，最少有不下6款新車推出；其中，較矚目嘅SUV市場，除有全新寶馬X3、越野路華Freelander外，若然大家有留意開車壇消息的話，相信定必曉得源出一轍嘅保時捷Cayenne，以及福士Touareg，佢哋原本各走各路，各有自己嘅市場空間，惟早前保時捷車廠，落實咗會推出同屬3.2公升V6版嘅Cayenne，而亞Mark亦聞得香港代理，早已開出新車預訂價64萬8千，重有望響明年上半年運抵香港㖭！若然成事的話，相信嚟緊3.0公升級別嘅CitySUV市場，又將會掀起一番惡鬥；惟以唔到65萬嘅車價，就可擁有一部高性能五座位保時捷車喎！又真係有一定號召力㗎！