我羅拉都留意咗日本藝能界好多年，真係睇住班尊尼仔大，最近終於發圍嘅尊尼仔組合KAT-TUN，啱啱出咗全新寫真集，我羅拉當然同班KAT-TUNfans即時搶購。
KAT-TUN六位美少年，今次專程去美國為寫真取景，佢哋第一次去到紐約街頭，一時着得好潮咁影相，一時又着晒西裝、好cool咁擺姿勢，KAT-TUN企喺條街，真係唔打得都睇得，冇失禮日本街坊。
當中最搶鏡係成對孖寶兄弟一樣嘅赤西仁同龜梨和也，佢哋兩個人雖然影親大合照都好咁巴閉企中間，但得番佢哋兩個人嗰陣，即刻流露柔弱嬌嗲嘅一面，喺鏡頭前都有唔少親密舉動，雖然有好強烈嘅同志feel，但唔少女fans都讚咁至夠卡娃兒。
班fans亦話成個「嫩版言承旭」嘅田口淳之助、「後生版押尾學加堂本剛」嘅田中聖同成個「乖版石田壹成」咁嘅中丸雄一都愈睇愈合眼緣。而感情最豐富又最易喊嘅上田龍也，雖然扮到成個Gackt同hyde咁，但唔少人都覺得佢愈嚟愈似妖版李克勤，不過，似克勤都幾靚仔吖。