喺尖沙嘴文化中心下低嗰條隧道，呢幾日，傳來陣陣充滿北方風味嘅歌聲，一位年約五十嘅祖國籍中年婦人，紮起一對辮仔，揸住一把粉紅色嘅中國扇，着起全套北方農婦服裝，喺一個阿伯拉嘅二胡伴奏之下，用女高音嘅腔調，唱緊一支五十年代嘅大陸名曲：「洪湖水啊，浪吖嘛浪打浪呀，洪湖岸邊，是吖嘛是家鄉啊……」
喺十度嘅寒冷氣氛之下，呢位大陸阿姑嘅歌聲，聽在年輕一輩嘅耳中，無疑令人更加打冷震，但係，喺五六十歲嘅愛國阿伯耳中，就有陣陣暖意在心頭，好似聽見毛主席時代祖國嘅心跳聲。
呢位祖國婦人，唔使審，就係經「自由行」落嚟搵食嘅個體戶嘞，唔可以叫佢哋行乞，天生有咁嘅歌喉，都係自食其力唧，兼而且加強吓香港人對國家嘅感情，面前擺住一個兜，冇強迫收費，若然係愛國嘅，就可以掟低一兩蚊。
可惜，香港人真係冥頑不靈，行經嘅路人，十之有九，唔係嘴藐藐，就係木無表情，直行掂過，完全唔理會呢位女同胞歌聲之中對祖國風土嘅無限熱愛之情！
點解會報道呢件小事呢？因為由一月一日起，根據國家「屍爬」政策，香港人將會有機會北上廣東，做個體戶嘞。呢項德政，係國家照顧香港人嘅大優惠，亦係挺撐阿董嘅有力行動。
咁即是話，一月一日起，唔單止會有尖沙嘴行人隧道嘅呢位祖國大嫂有機會以個體戶身份來港，向港人揸兜獻藝，香港人亦將會有機會，以個體戶身份北上廣州，喺海珠橋、喺長堤、喺烈士陵園，表演歌喉，唱《小李飛刀》，同埋許冠傑嘅《財神到》嘞。
一月一日，係一個大日子，珠三角進一步大融合，中港個體戶雙程大交流，屆時大量祖國同胞，可以南下獻技，香港人亦有機會北上唱歌賺錢，二十年來流行嘅卡拉OK行業，養兵千日，唔會白費！
點解會咁呢？因為阿董六年幾，將香港人先變為負資產、再改造為個體戶。最弊嘅就係，祖國同胞，識得補鞋、車衣、心口碎大石、連街頭賣唱，都專業過我哋香港人。
八方喺隧道睇咗一輪，大有感觸。港人北上，憑乜嘢同國家十三億人口競爭？
呢個問題，香港人有權利，喺一月一日，齊齊上街向阿董提出，要求佢畀一個答案！
傳真︰2623-9278
電郵︰