曼聯前晚小勝米杜士堡一球，我求大俠同好多波友一樣，究竟紅魔入球應該計算科東尼，定係米斯「擺烏龍」？結果，馬會足智彩就計烏龍波，「首球」派彩計無首名入球。
烏龍波一直都無準則，通常計最後接觸皮球球員，前晚科東尼的確有射門意圖，但係唔省中米斯就未必入，呢個烏龍球就比較明顯。又好似「拆禮物日」，阿仙奴對狼隊開紀錄個球，初時電視台都打出入球計韋拉，但最後統一計卡杜克烏龍波，結果足智彩「首球」派彩計第二「士哥拿」嘅亨利。其實，我求大俠覺得無首名入球，莊家最高興，投注飛數一定少，尤其曼聯賽事，點會諗到「無入球」呀？
被綁細佬傳重在生
AC米蘭後衞卡拿迪斯日前歡天喜地咁話，格魯吉亞警方查到佢嗰位兩年半前被綁架嘅細佬，有九成機會重生存，重有可能短期內獲救㖭。卡拿迪斯早排養傷幾個月，歇冬前對烏甸尼斯又食咗面紅牌，假如能夠同細佬重逢，就真係否極泰來，攞到最佳新年禮物。希望佢如願啦。
獲英頒榮譽博士學位
被公認為世界首席球證嘅哥連拿，球場內執法嚴明，球場外又樂於參與慈善活動，形象夠晒正面。「光頭佬」最近就獲英國一間大學表揚，獲頒贈榮譽科學博士學位，威過威士忌。叫慣佢做「光頭佬」嘅人，係時候要改口叫佢做「光頭博士」嘞。
逐費查離場明恰新仔
前日嗰輪英超問題球多多，布力般保羅加歷查對紐記入嗰球有手球之嫌、曼城科拿射破利物浦球波似乎越位；尾場曼聯對米記，球證麥沙斯直至趕費查出場之前都壓唔住場。我唔明白點解費查兩犯離場，而向傑斯開肘嘅米斯就無事，唔通佢博費查好蝦啲，犧牲個小朋友殺一儆百？
聖誕唔送禮畀判官
意大利球隊有個逢聖誕同新年期間送禮畀球證嘅傳統。今年羅馬同國際米蘭係大豪客，前者送名牌香檳，後者就送名酒加靚火腿。乙組費倫天拿就送葡萄酒、維琴察就送通心粉……，不過祖雲達斯同埋AC米蘭就決定唔送，費事成日同球證偏幫事件扯上關係，一於避嫌。