雖然燃氣概念似乎已經無以前咁好炒，加上早排燃氣股龍頭華燊燃氣（8035）又話俾證監會抽秤，但仍然有人樂此不疲，繼續投入呢類項目。
好似去年曾經無厘頭炒過嘅中盈控股（766），噚日公布截至今年9月止中期業績，盈利上升1.7倍後，又公布同光大簽署意向書，在大陸一齊合作投資燃氣業務。
經紀陳話，做開大陸房地產嘅中盈，搞燃氣得唔得佢話唔知道，但就知道隻股向來有人幫手睇住，兼夾貨源夠疏，所以想話趁市旺借燃氣概念炒作都無話唔得。
中盈噚日升1.45％，收0.7元，但成交就只得111萬股咁多，即管睇吓燃氣呢個概念重靈唔靈。
另外，在假期前急升的中國數碼信息（250），噚日連埋阿仔南海控股（680）一齊停牌，小初重以為有料到，但經紀陳就叫小初唔好咁興奮住，話中國數碼信息雖然未炒完，但今次同阿仔停牌，據講只係雙方之間的一些資產重組活動，尚未係戲肉。
慕容小初