消息不利國企，但國企指數卻升得最多，早段跌過2.8%，埋單則升2.1%，有重磅國企撐住。芬佬年底搞櫥窗裝飾活動，銀彈打贏不利消息。
國企主角中石油（857），最低3.775元，高收4.075元，低位彈上去，有8%，好幾隻中石油Call輪喺龍虎榜上入圍，全榜排第2嘅係9125，呢件係鎖定回報輪，收99仙，升幅15%。非標準輪啲數據，唔係容易計，啱啲專家玩；標準輪，正路對象係9309，明年6月到期，輪價86仙，溢價1.6%，槓桿率4.7倍。買9309有冇得執，當然要睇正股會唔會繼續去，呢一點最難估中，芬佬繼續買，隻股自然有得升，股價升到咁嘅地步（個半月唔夠升50%），正常分析係買過龍，追落去會有風險。
上榜威水輪有件華能Call輪9933，收37.5仙，升14%，有34球易手。正股（902）收13.30元，有3.5%進帳。9933又係鎖定回報輪，等專家玩。正路標準輪，揀9913，明年6月到期，輪價1.93元，溢價3.8%，槓桿率6.9倍。另1隻標準輪9196，則屬高風險輪，明年4月到期，輪價56仙，溢價24.5%，非常高，槓桿率23.8倍，非常大。如果正股牛皮一兩個星期，呢件會縮水縮得好緊要。
電盈（008）高低位10仙，估計已近谷底，諗吓Call輪玩反彈遊戲，少少哋買啲9791，相信回報大過風險。
章盛