港股噚日受廣州沙士疑雲影響，大部份時間都走低，恒指一度下跌120點，但低位承接力好強，午後行情逐步回升，結果以接近全日高位12464收市，進帳7點，但現貨月同1月期指都低水，而下跌股亦比上升股為多。
基金繼續做大好友，噚日繼續收集，特別係國企股，由跌幾個巴仙買到升幾個巴仙，確實唔簡單。國企指數噚日一度下跌130點，收市倒升97點，已經上到接近4800水平，基金買得咁「行」，國指喺4800至5000整固一輪後，可見5500。
芬佬話，呢一兩日，個市應該唔會有大波動，個別股票則會粉飾下櫥窗，但踏入04年，佢哋就會有一連串大動作，特別係國企同近期有消息的股份，升勢會好急。
Tom.com（8001）宣布，將分拆互聯網業務Tomonline在創業板及Nasdaq上市，現時Tom.com股東確保享有可獲分派Tomonline股份的權利，形式包括分派股份作為股息，或可優先認購股份。Tom噚日以高價2.35元收市，升8%，成交更大增到3380萬股。
芬佬早輪已畀料，話要留意Tom仔，佢哋喺呢個多月來，在2.1元至2.3元間，亦一路咁密密收集，消息話基金界對隻online睇得好好，成功上市後所反映嘅價值，可以令人對Tom仔另眼相看。今年5月，Tom曾經升上2.8元，今次借分拆造上，芬佬好有信心股價可重遊高位。
Tomonline主要業務包括在中國的無線增值服務、經營無線互動語音業務的雷霆無極、網上廣告，以及商務企業決定方案。內地互聯網市場發展迅速，Tomonline前景好樂觀，估計上市PE在10倍水平，市值約在80億至100億元。
近大半年來，Tom.com走勢正營造一大型雙底，頸線在2.7元水平，噚日大升，形成一支大陽燭，且一舉而升破10日、20日同50日線阻力，由於動力轉強，中期上升大浪展開，短線阻力在2.7元，整固後再上，雙底形態確認，上升目標指向3.4元。
郭兆誠