聖誕假後好快就係新年，但港股喺呢段卡罅時間成交仍算活躍，恒指早段受廣州沙士疑雲陰影下跌逾百點，其後在滙豐（005）支持下，回升7點，收報12464，成交達140億元。不過市場焦點仍在新股身上，中國人壽（2628）更加令唔少股民大跌眼鏡，因為此股市值規模唔小，一般人以為股價升30％至40％便會止步，點知走勢反而愈來愈勁，噚日又升10％升至6.40元，累計升幅78.3％。
二三線股中，早已乾升不少的華德豐（297）噚日突然出現大成交，達3033萬元，股價升41.46％，收報0.29元，真係唔講得笑。黑客聽聞話，中化香港可能會行使認購權，正式做華德豐大股東，並借殼上市，甚至可能提出全購。華德豐大股東飛天朱將股份抵押畀中化香港換取5358.6萬元融資，並向中化香港授出抵押股份之認購權，令中化香港可增持華德豐至35.82％，成為大股東。
國企股早段曾借中海油（883）調低明年產量消息及中石油（857）氣井出事而調整，不過轉頭又回升番，國企指數收報4761，升2.08％，唔知同今日H股期指結算有無關係，不過未平倉合約加埋唔夠7000張，應該吸引唔到大戶推高國企結期指。
國企之中，公路股造好，主要是江蘇寧滬（177）宣布獲准調整路費，標準收費變相加價12.5％。
先前歐資已大力吸納公路股，Cookie話可能重有其他公路股會作出類似的加價宣布，應可進一步刺激公路股的升幅，當然早前掃入嘅歐資亦可能隨時出貨食胡。
阿虎