拆禮物日最令人反胃嘅新聞就係北京有人慶祝毛澤東一百一十歲生辰。呢個一代魔君，早死早着，如果早死十年，中國就唔會有甚麼文化大革命，劉少奇、鄧小平一早掌握大權實權，中國人民生活唔知會好幾多，亦都輪唔到楊利偉做第一位中國太空人，錢鍾書、陳寅恪、王世襄等等等數之不盡嘅碩學鴻儒唔使老年受苦，老舍唔會投湖死，當然亦可能唔會發生六四事件。
總之，毛澤東死得遲，害死中國，𠵱家重紀念佢做乜。陶傑講得好啱，毛澤東就係中國最大嘅國殤。中國大陸一日不走出老毛魔影，始終難服普天之下嘅華人愛國心。愛國可以係愛文化中國，如果愛國一定要愛埋老毛思想，點都要媽叉。
不幸中之大幸，就係北京官方對慶祝毛壽，十分低調，搞慶祝活動嘅單位，據講要蝕本，皆因攞唔到足夠贊助也。邊個民企老闆、私人企業會癲到贊助支持毛澤東嘅活動呀？有老毛在，或者毛澤東思想仍然籠罩北京，你班民企大款統統都要判入勞改營，全部抄家啦。做生意而贊成老毛者，唔係IQ低就係黐咗線。公關小YY喺瑞士讀酒店管理，班上好多大陸學生，小YY話佢哋唔多睇得起南方人，講起就話：「南方多暴發戶，不懂文化，都是農民！」農民當然係指農民心態，睇陶傑文章就最清楚。不過賺錢暴發嘅或面目可憎，但一定健康過北京某些人慶祝毛壽，呢啲人先至係延安時代嘅農民。