近排股市係咁升，唔少股民有斬獲。聽市場講，一班嚟自紅磡黃埔花園嘅「師奶兵團」，約十五人，見西鐵概念有得炒，已經喺上個禮拜六，動用二千四百萬，大手買入元朗YOHOTown二十個單位。
佢哋趁發展商新鮮熱辣推出第六座發售，噚日再度用一千萬買多八個單位收租。前後掃入二十八個單位，果真豪氣。
據聞，呢班師奶兵團喺股票市場獲利，齊齊遠征元朗炒樓。佢哋以往多數炒賣黃埔花園單位，見到西鐵通車，即刻把握呢個「炒概念」機會，第一次出擊就大手入市，都咪話唔夠市場觸覺。況且，YOHOTown第一期都賣得七七八八，屋苑又以配套規劃完善做賣點，長線都有投資價值。
聽聞，呢班「師奶兵團」預計日後出租單位，每方呎租金八至九蚊，回報率有五厘半左右。