皇家馬德里今年東亞之行相信好多球迷至今仍然津津樂道，皇馬高層亦食髓知味，計劃明年夏天再次東來掘金。
施丹、朗拿度、碧咸等6條「A」，已經足夠號召力，在亞洲各國地區颳起「白色旋風」，四場友賽出場費，再加球星的周邊利潤，真係賺到笑。皇馬明年東行計劃，初步訂重回北京同東京，再加上漢城，日期為八月初。
不過，我求大俠就質疑，6「A」中有四人明年六月踢歐洲國家盃決賽周，最多只有一個月休息；好似今年咁，球季尾無大賽，施丹對東亞之行都有埋怨，球季未到一半開始有疲態；皇馬搵錢之餘，應該諗吓呢個計劃會唔會影響到啲球星喺聯賽表現喎。
費倫天拿準備動用二千萬歐元，無聽錯，係二千萬歐元擴軍，希望盡人事博來季升班。喺現今市道嚟講呢筆錢真係唔嘢少。費倫繼由佩魯賈引入維沙斯後，成功撬走萊切隊長比安格利尼，嚟緊重可能引入加盟安玻里觸礁嘅巴拿班。各意甲中下游球隊，要小心防範紫衣大軍挖角嘞。
祖雲達斯教練納比最近放風，話唔排除喺出年歐洲國家盃後執教意大利國家隊。納比同祖記簽約到○五年，咩球隊挖角都難得逞，但據聞合約列明如果係國家隊，納比拍吓屁股就可鬆人，無得傾。要搵番個熟路同埋夠份量嘅教練唔易，祖記最唔想嘅事隨時發生，球會高層頭痕啦。
英超包尾球隊狼隊嘅領隊戴夫鍾斯話，會喺一月轉會市場重開時擴軍，目標就係愛華頓嘅鄧肯費格遜，佢重話會不惜出到三萬五千鎊（約四十五萬五千港元）周薪羅致呢名長人前鋒。不過，我求大俠就覺得如果狼隊肯出三萬五周薪，需唔需要買三十有二嘅鄧肯費格遜呀？
外國人好重視聖誕節，不過相信西甲球隊馬拉加嘅球員，喺今個聖誕一定唔敢咁盡興。因為佢哋嘅教練拉莫斯喺聖誕前要全體球員上磅，復操後會喺星期二會再要佢哋上磅，比之前肥咗，就要加操（連元旦日都要操）。如果重係減唔到磅，重可能要扣人工㖭！呢招都算絕嘞。