胡杏兒日前神神秘秘揸車到青山道嘅一幢工業大廈，佢喺上面逗留咗一個鐘頭左右，就突然推住架載滿ＤＶＤ機嘅手推車搭𨋢返落嚟，然後就落手落腳做埋苦力，親自將啲ＤＶＤ機搬上車。
嗰日下晝三點幾，胡杏兒同經理人上咗去工業大廈後，隔咗一個鐘，有個男仔就幫佢手，一齊推住架鐵車仔落嚟，原來胡杏兒最近為一隻ＤＶＤ機品牌做代言人，廣告商重好錫佢，話趁住過年過節，叫佢攞啲機送畀親朋戚友，所以嗰日胡杏兒至特登走去貨倉搬貨，做聖誕老人咁話！
胡杏兒都算唔話得，攞完機之後，又做埋司機，包埋送貨服務，親自揸車去又一城，將啲機派畀贊助佢髮型嘅髮型師㖭。如果年年都有個靚女周圍派禮物，咁就真係普天同慶啦！
組合Cookies噚日去港台出席活動，佢哋下月會同單親家庭及殘障人士去台灣旅行，不過當主持人考Cookies嘅普通話時，Stephy竟然將馬英九讀成「馬英狗」，令人啼笑皆非，佢重死撐話只係示範個錯嘅讀音，不過Cookies話要趁旅行學好普通語，費事出醜！希望佢哋萬一見到馬英九時唔好讀錯就好嘞！
梁漢文噚日出席港台活動，問到佢老友蘇永康喺台灣蒲吧又出事，佢非常愕然咁反問「乜康仔喺台灣咩？」梁漢文話平安夜先同康仔見過面，但就唔知佢去咗台灣。至於有報道指梁漢文同古巨基爭獎，佢話：「有冇搞錯？自己冇所謂，之前都傳過我同許志安，總之冇咁嘅事，大家唔好咁儍，下次嘴對嘴畀你哋影張相囉。」
台灣女藝人楚謹前日凌晨同蘇永康以及香港一間酒店嘅太子爺鍾振瑞喺台北蒲吧，其間一位姓孔嘅女同志疑為楚謹而爭風呷醋，當眾扑穿鍾振瑞個頭。點知噚日上晝十一點左右，馮仁昭個老友竟然發現楚謹同嗰位女同志一齊喺敦化南路食晏，唔知佢哋究竟係講數定係和好如初呢？後來有人喺餐廳認出楚謹，但佢就死口唔認係當事人。
麥潔文噚日帶埋一對仔女喺尖沙嘴出席「聖誕親子互動繽紛Show」。講到親子關係，麥潔文話成日同個仔打籃球，佢話：「近排個仔買咗個籃球番嚟又唔識打，咁我同老公都係籃球高手，咪一齊玩順便教佢。」佢哋成日打籃球，唔怪得佢個仔高得咁快喇！
