過完快樂聖誕，又返嚟股市呢個大戰場，雖然假期之前全世界的焦點都在兩隻勁抽新股國壽（2628）同埋紫金（2899），但其實好多股份一直在蠢蠢欲動，只係聲勢唔夠新股咁浩大而已。
其中新海環保能源（342）就係當中一員，隻股由本月中公布以1.4億港元收購珠海液化氣項目之後，股價就一直升個唔停，兼夾成交大增，股價由唔夠0.13元，升到假期前的0.151元。
究竟呢個項目有幾正？經紀陳就好坦白咁話唔識睇，但佢就知道隻股繼金手指入股之後，近日又獲得股壇大姐大相助，令隻股如虎添翼，最關鍵就係11月份新海的一次配售。
話說新海在11月按每股0.12元，配售4.16億股新股，集資4800萬元。配售完成之時，正好係公布新收購項目之日，而股壇大姐大的好友，又咁蹺做咗其中一位承配人，持股量更超過5％之多，但隨着新海股價上升，好友亦慢慢在市場上減持。查實以現價同配售價相比，有份認購上次批股新股的人，利潤真係唔錯。
慕容小初