雖然大後日先到○四年，不過下年喺美國上映嘅春夏季新片已經準備就緒，相信唔少影迷同我羅拉都好期待《蜘蛛俠》續集同《哈利波特阿茲卡班的逃犯》，但係除咗呢啲大片，其實重有好多唔同種類嘅戲。
春天上嘅電影百花齊放，阿當桑迪拿（AdamSandler）同杜莉芭里摩亞（DrewBarrymore）繼九八年《愛情嚟料》之後，情人節會有套愛情喜劇《50FirstDates》，跟住會有「愛情天后」美琪賴恩（MegRyan）做拳手經理人嘅《AganisttheRopes》，呢部戲相信會比佢之前剝衫又扮高深嘅《IntheCut》較易接受。三、四月分別有妮歌潔曼（NicoleKidman）主演、較為沉鬱嘅《Dogville》同改編漫畫嘅《Hellboy》，啱晒唔同口味嘅影迷。
踏入五月暑假檔，人氣動畫《史力加２》同以特技為賣點嘅災難片《明日之後》會打頭炮，妮歌另一部新片《TheStepfordWives》喺六月出籠，湯漢斯（TomHanks）扮歐洲新移民邂逅空姐嘉芙蓮薛達鍾絲（CatherineZeta-Jones）嘅《TheTerminal》亦勢成擂台躉，八月重有《AlienvsPredator》，異形大戰鐵血戰士，科幻片影迷實唔會錯過。