中區甲級商廈巨無霸國際金融中心二期，出租率已經超過一半，減輕咗同區嘅租務壓力。市場當然有興趣想知有啲乜租客，蘭西喺土地註冊處搵到嘅資料，發現原來上市公司松日通訊控股係租客之一，租咗二十二樓全層，月租要八十三萬四千幾蚊，三年合約，以全層面積約二萬三千呎計，呎租約三十六個三，當然呢個只係面價，未計優惠啦。
另一上市公司森那美，承租三十五樓○一至二室，月租近十一萬二千蚊，租期五年。市場指面積約四千呎，呎租二十八蚊，呢單成交應該喺幾個月前傾妥。
另外，早前發展商高調講出嚟嘅大客，安永會計師事務所，租咗六層共十八萬呎，租期十一年，蘭西發現其中十五至十八樓，起租日係○五年五月一號，莫非之前嗰段期間係免租期？安永話單租務係喺沙士期間落實，唔知係咪因免租期有成年幾，係吸引佢哋咁爽手承租嘅原因呢？
聖誕節有兩日假期，好多港人都出外盡情消費，輕鬆一吓。北京雖然唔係假期，但零售市道一樣咁旺，好似東方廣場嘅「東方新天地」，兩日每日都錄得超過二十萬人次，認真熱鬧。為咗迎接○四年來臨，呢個禮拜三會延長營業時間到凌晨一點，重舉行倒數活動。商場會抽出五名喺當日消費嘅顧客，參加超市「兩分鐘限時搶購比賽」，「搶購」總值最接近限定金額嘅，就可以將「搶到」嘅貨品全部拎返屋企。
樓市向好，買家爭住入市，但拍賣行反而憂心忡忡，唔係咁開心，聽卓先潘子明講，原因係銀主盤不斷減少，即係話佢哋生意會愈嚟愈少啦！咁又點笑得出呢？
潘子明講，𠵱家市場大約有七八間拍賣行主力做銀主盤拍賣，一個月起碼要拍四次，每次拍二三十個盤；但係佢聽聞有同行明年開始要減少拍賣次數嘞。為咗生存，拍賣行都要轉型，例如做多啲業主拍賣，或者轉攻投資者，又或喺服務方面做好啲。
香港人鍾意飲飲食食同行街買嘢，所以市場有好多呢類資訊指南，中區大地主置地集團都有一本叫「CENTRAL」嘅指南，重有VIP版本㖭。蘭西啱啱收到一本，圖文並茂介紹中區飲食、購物、蒲夜熱點、重有健體美容同藝術展覽品等。
呢本指南超過一百頁，用黑色封套包住，感覺高級，搞到蘭西睇完，都好想即刻去中環逛街，揸住佢真係一書在手，通行中區。呢本指南重有埋中文版本㖭。
中原（工商舖）董事總經理陳雁樓話，今個月到𠵱家，公司生意已經超過二千萬，估計全月埋單可以有二千五百萬，全年佣金收入就高達一億四千萬，比舊年增加一半，重係工商舖部成立以嚟嘅新高。佢話今年投資市場氣氛一反年底例靜局面，到𠵱家重不斷有成交。陳雁樓估計，呢股入市熱潮可以一直維持到明年上半年。
蘭西
電郵地址：
