「（區議員）委任制根本係不文明同不公平，市民應該出聲表達不滿，我希望透過今次元旦遊行，引發市民討論用乜嘢方式普選特首，搵到共識之後再同政府爭取，一個人嘅力量始終有限，希望市民為民主一人行多一步。」
「元旦大遊行除咗係反對區議會委任制之外，亦都係表達對政府不理民生、忽視勞工階層嘅不滿，董建華政府過去六年官商勾結，樣樣聽命於大商家，打工仔喺元旦日應該企出嚟，講出自己嘅心聲。」
「7.1係反對23條嘅生死關頭，所以當日一定要出嚟，7.1後政府係有啲讓步；但係仍然唔肯聽市民嘅民主訴求，冥頑不靈，繼續委任區議員，一月一日係一年嘅新開始，我哋一定要繼續堅持爭取民主。」
「7.1同1.1嘅共通點都係要爭取民主，因為民主唔係天跌落嚟，7.1成功阻止23條立法，證明人民力量勝利，雖然元旦遊行未必會有咁多人參與，但係可以作為民主運動嘅熱身，用腳話畀政府聽，民主我哋點都要㗎喇，冇得傾，我一定會去。」
