廣州整單疑是沙士病例，可能為港股添上一個唔明朗因素，暫時最好等等，睇吓事態如何發展。若然個市因而大散，則又可以諗吓買啲Call輪博吓。希望沙士單嘢冇不利變化，又或者最好證明唔係真嘢。
中企Call輪（即係國企指數Call輪），有平貨可博反彈，芬佬搞國企，耐唔中郁幾隻重磅國企，國企指數跌完可再升。搵對象，有兩件，就係9317同9366。9317明年5月到期，輪價56仙，溢價1.7%，槓桿率4.4倍。9366明年6月到期，輪價35仙，溢價5.1%，槓桿率6.7倍。其他同類輪，有個別啲數據都算唔錯，只不過交投太靜，唔易轉身。
中電信（728）近期走勢唔錯，一級級上，有機會回吐嘅話，吼低買啲Call輪，正路對象係9225，明年6月到期，輪價48仙，溢價8.9%，槓桿率6倍。
中移動（941）走勢有啲似中電信，又係可以見佢回落時，吼低買相關Call輪，主角係9902，缺點係壽命稍短，但溢價低補番數。隻輪明年2月夠鐘，輪價25.5仙，溢價1.9%，槓桿率9.2倍。
聯通（762）走勢近期落後畀中電信與中移動，但因落後博相關Call輪，亦冇乜對象。3件明年4月至6月到期嘅Call輪，溢價最低都19.5%，而且交投又唔得活。
章 盛