鄺其志為咗要配合一月一日返新工，去幫葉謀遵博士間新昌做董事總經理，佢早前話自己來年工作繁重，暫時要停寫專欄。
鄺神童封筆，最高興莫過於以老董為首嘅特區政府，皆因過去半年，神童無官一身輕，得閒就喺電台開咪，議時論政，7.1重去埋維園集會。
鄺兄封筆其實都幾合時，佢最大嘅仇人阿松因偷步買車已經黯然下台，律政司話佢表面證據成立，但唔係百分百告得入，所以放佢一馬；打咗咁嘅烙印，阿松下半生都肯定冇神童咁高大威猛。
神童最近就呢單嘢嘅總結，指啲棄商從政嘅人加入政府，不但冇改善政府效率，更罔顧程序、全無規矩，損害咗政府嘅威信。神童此言一出，肯定好多政務官出身嘅高官都拍爛手掌，不過日後佢要搵真銀，睇怕有排唔會咁多嘢講。
傳真︰2623-9278
電郵︰