沙士大瘟疫果然準時翻啅珠三角，廣東省衞生廳被迫承認，發現一宗沙士個案，患者羅堅，係「自由電視節目製作人」（乜大陸都有「自由」兩個字嘅咩，都咪話唔淚中有笑），十二月十六號頭痛，檢查之下，十日後確認為沙士疑似個案。
唔經廣州《南方都市報》踢爆內幕，廣東省政府都重係想冚實。《南方都市報》好學唔學，學咗資本主義社會嘅新聞路線，特別係學咗《蘋果》專門踢爆醜聞嘅偵查報道。呢份報紙嘅總編輯，睇怕又會犯下「洩露國家機密罪」，兼唱衰祖國，抹黑廣東，受外國勢力利用，唔知會判幾多年監禁重刑，真係令人擔心。
點解沙士又復現廣州？無他，咪又係屠宰野生動物，劏山貓、飲蛇血、割熊膽、食穿山甲，暴虐不改，賤性難移。沙士病毒經已證實係野生動物向殘酷嘅廣東佬報復所引起。今年沙士三月大爆發，大陸都已經話咗禁野味，不過凡事三分鐘熱度，加埋野生動物屠宰，喺珠三角養住好多人口，真係禁，即是官迫民反，容乜易造成類似明末嘅李自成暴亂？
今次廣東省衞生廳，唔知係咪太陽由西方升起，竟然主動將疫症資料交畀特區衞生署喎。真係奇嘞，今年一月，衞生署問廣東攞，佢就唔畀，搞到特區政府，要向北京中央告狀。廣東省衞生廳有冇諗清楚呀今次？乜唔係話沙士冇證據係由廣東省最先爆發，有可能係香港傳上去嘅咩？今次證實沙士由廣東省產生，咪好冇面？咁冇面，廣州市又點做珠三角龍頭呀？
講到冇面，又邊個唔要面得過董班子。區議會委任議席，董班子不理市民訴求，照樣派大包。董班子受到民建聯遺棄，都重係唾面自乾，委番六席畀民建聯，可能個心重喺度怨緊喇。呢個政府搞到身價低賤，係有原因，連自由黨都喺度吟吟沉沉，委少一席，張宇人就拜神唔見雞咁怨董班子，覺得董班子因區選效應，迫於民主威脅，不惜犧牲埋自由黨嘅利益。
一個蠻荒地區，自然會瘟疫不斷，一個低能嘅政府，自然會有弱智嘅政黨。珠三角病毒大融合，沙士屍爬自由行，個市啱啱生番少少，六百萬市民又要重新戴口罩，啲名流藝人去酒店偷食淫亂，又冇咁易俾人點到相嘞！
傳真︰2623-9278
電郵︰