聖誕佳節本應普天同慶，但今個聖誕除咗有福音，重有好多壞消息。伊朗地震、非洲墜機、重慶「井噴」，已經死得人多，再整多單廣州沙士疑案，搞到趙飛雲冇心機食聖誕大餐。
美股上周五半日市，微升收場，對今日港股刺激有限，市場焦點相信會落在沙士疑案。若最終證實病者染上沙士，港股借勢作出較大調整的機會頗高，須知恒指在12500高位水平徘徊多時，未能破關而上，呢種市況，對壞消息往往相當敏感。
當然，衞生當局在年初吸收咗唔少寶貴經驗，沙士再現大規模爆發之機會相信不大，港股明年大形勢依然向好，逢低吸納仍是最好的策略。港股短期若現調整，50日線12191會是第一道有力防線，該處亦是4月至今升軌所在，支持力相當強。
後市雖因沙士疑案變得不明朗，但個別實力股仍要睇到實，啱位就要買，遠東發展（035）就係其中之一。
說實話，遠展予人印象一向並非太好，但近年卻有轉變，掌舵人作出不少努力，希望成為基金愛股，較早前派中期息即其中一步。近日遠展將所持遠東科技股權售予邱氏家族，令遠展業務更加清晰，此舉相信是為基金入股鋪路也。
趙飛雲