任賢齊（小齊）今年拍了兩部電影《飛鷹》和《花好月圓》，兩部戲佔了他七個月的時間，只因拍《飛鷹》時遇上沙士，不得不停止拍攝，最後花了半年時間完成此片，身為歌手的他今年好像沒有在樂壇上努力過，好像不太像樣？小齊說：「我都有啲覺得唔好意思，但係如果我拍嘅兩部戲成績好，咁我就可以有一啲唔同嘅收穫，所以今年有唔少內地嘅頒獎禮邀請我出席，我都唔好意思去，因為我諗諗自己今年好似冇乜歌，如果去攞獎好似唔知點咁。」
小齊不知不覺來港發展已有五年，以往有不少台灣歌手在港發展都只是曇花一現，小齊卻依然保持吸引力，連他也覺得是個奇迹，小齊說：「我都覺得自己幸運，我又唔靚仔，廣東話又講得唔好，但有好多人支持我，真係好多謝香港嘅朋友同歌迷。」
小齊解釋：「可能我比較平民，我去到邊啲人都同我打招呼，好似當我朋友咁，同埋我同其他台灣歌手唔同嘅地方係我有電影keep住喺香港上映，所以先可以喺香港嘅娛樂圈咁耐。」小齊亦說要多謝張艾嘉，因為他當年到港發展時，都是由張艾嘉協助他揀劇本，他才不致揀錯戲拍。
在港發展最辛苦莫過於要學廣東話，小齊憶述：「啱啱嚟嘅時候真係一句都唔識講，搞出好多笑話，成日唔小心講咗粗口，我記得嗰時同我經理人一齊出去傾嘢，人哋係咁同我講嘢，我都聽唔明，最後人哋都係同番我經理人講國語，都唔知幾瘀，所以我都好感激我經理人，佢都為我做咗唔少嘢，我哋最初人生路不熟，到𠵱家算係有小小成績，佢嘅功勞都好大。」
記得初初認識小齊的時候，真是給他的廣東話笑死，小齊竟連自己的中文名都讀歪，不停叫自己做「任人砌」，有次更錯將楊千嬅由「鄰家女孩」說成「輪姦女孩」。可能就是這種半鹹半淡的廣東話已經成為他的標記，替他加了幾分儍氣，使他可以在香港娛樂圈繼續立足下去。
撰文：胡比
攝影：陳慧安
場地提供：HairCulture
髮型：BillybyHairCulture
化妝：AngleYip
