今年真係多事之秋，一年將結之時，廣州又再出現沙士疑似個案，難怪學友社所舉辦嘅「中學生眼中的2003十大新聞選舉」，十三萬投票嘅中學生，有十萬人（約七成八）都選沙士襲港做十大新聞，令沙士事件成為十大之首。
同沙士爆發差不多同時發生嘅大事，重有《蘋果》踢爆阿松喺預算案公布前偷步買車，不過呢單新聞只爭到第十五位，得票率為兩成八。而阿松同葉劉淑儀同日辭職呢單大新聞，就啱啱「梗頸」排第十一，入唔到十大，唔知阿松同葉太應開心定唔開心？
不少學生哥都有參與嘅7.1五十萬人大遊行，就以千幾票排第二，神舟五號升空同太空人楊利偉訪港，分別佔咗第三及第四位。
不過八方好奇怪總理溫家寶訪港，喺三十條候選新聞中排到第二十七，僅比平機會解僱風波高一位，輸咗畀美國影星阿諾舒華辛力加當選加州州長單新聞。
學友社呢個選舉今年已踏入第十二屆，喺十一月底至十二月中舉行，投票學生來自近百六間中學，每人喺候選新聞中選出十條。
傳真︰2623-9278
電郵︰