過完聖誕好快又到除夕夜，可以大玩一餐。如果想提早開Party的話，今日可以去灣仔駱克道蒲一蒲，呢度除咗有好多特色攤檔外，逢星期日重會封埋成條馬路，路旁的餐廳及酒吧會將枱椅放晒喺路邊，又有樂隊或魔術表演，十足十外國流行的街頭嘉年華會！行完一趟，發覺除咗好玩熱鬧外，順便掃埋除夕的狂歡用品就最啱！
記者：何善華 攝影：楊錦文
模特兒：Kit、Adriana（Imagine）
呢個名為MardiGrasParty的嘉年華會，由即日起至2004年2月29日，每個周日都會喺灣仔駱克道（盧押道與分域街地段）舉行，而這次嘉年華會所獲得的收入，將會捐助香港單親協會，有嘢買又有得玩，非常有意義，如果今日得閒的話，不妨去趁一趁墟！
想在除夕夜打扮搶眼、引人注目的話，呢個派對眼罩一定是你的首選。整個眼罩均用彩色羽毛組成，橙色配紫色鮮豔奪目，眼圈位置還有藍色珠片圍邊，經濟超值。另外心形閃燈棒亦是值得推介的玩意，只需2粒AAA電，紅心就會閃呀閃，備有紅色及銀色兩款。
一條彩帶是最簡單又最搶眼的點綴品，呢個攤檔都有唔少款式任你揀，淺藍、紫、白、綠、黃等顏色應有盡有，戴上身可以裝飾襯衫之餘，包住條頸又夠暖笠笠，如果要買多種顏色的花色羽毛彩帶就要貴多10蚊。
有特大、大、中及細共四款的彩色條炮，亦是派對狂歡的必需品。檔主話彩色噴條炮可以射到三層樓高，滿天碎紙的一剎那十分壯觀。玩法極似爆竹的彩色噴條炮只可使用一次，用完即棄。當日見到檔主不時射幾支上天，成條街的氣氛當堂High晒。
一盒有兩支蠟燭，有薰衣草、香草、花香等氣味，備有六種顏色選擇。每支蠟燭約可燃燒八小時，乃除夕食大餐的餐桌最佳點綴品。
出年就係猴年，不如買番套用玻璃水晶及鍍金製成的十二生肖模型應應節。十二隻中國生肖動物放晒喺木架上，檔主為咗吸引市民購買，重送埋個木架並將十二隻生肖黏喺上面，一套齊齊整整，送畀人都唔錯。
飾物全是檔主親手製造，有鏈墜、襟針、手鏈、頸鏈、電話繩等，造型特別，材料有貝殼、岩石、海星等，夠晒天然，繩索可以免費另配，總之揀啱為止。
嘉年華會有攤檔可以即場玩「閃粉紋身」，只要你想要甚麼圖案，檔主就會即刻幫你設計，每次收費$40，圖案可以保留至少一星期，閃令令幾趣致。
大會亦邀請到魔術師喺市民面前表演各式各樣的魔術花式，變完兔仔再變絲巾，每位小朋友都看得津津有味。
地點：灣仔駱克道（盧押道至分域街地段）
舉行日期：逢星期日舉行，至2004年2月29日止
時間：1:00pm-10:00pm
備註：灣仔地鐵站C出口，沿駱克道左邊直行至盧押道街口即到。