上個禮拜因為聖誕假期關係，港股只係得兩個半交易日，藍籌股成交就一如往年般稍為回落，不過對於幾隻新股嚟講，就愈戰愈勇。好似紫金（2899）同國壽（2628）咁，無論以成交額又或者升幅計，鋒芒皆蓋過晒所有藍籌股，單單以隻國壽嚟計，喺平安夜嘅半日市就佔咗總成交兩成咁滯，睇番當日嘅盤路，完全唔係啲掃幾吓就冇料到嘅散家盤，反而大部份都係啲大大撼嘅「芬佬」盤。
有個專做「芬佬」盤嘅行家同伏勝講，話佢哋之所以買貨買得咁狼，完全係因為隻國壽會喺出年1月6日被列入成為MSCI指數成份股，又話到咗嗰幾日，全球只要係有按照MSCI指數成份股嚟執藥嘅指數基金，都要喺嗰幾日買入大量國壽，到時隻國壽俾人搶高到去邊個水平好難估，所以好多博跑短途嘅炒家喺隻股升上5蚊後，仍然好積極咁入貨，叫伏勝不妨留意一下，不過由於隻股都已經由上市後最低價4.3元升咗7成有多，去唔去真係要自己諗清楚先。
至於另一隻風頭躉紫金由於貨疏到極，好多散戶攞唔到貨，甚至連一啲基金大戶都係分得嗰十零手，有個喺保薦人公司做嘅朋友講，今次隻股由於貨源好歸邊，冇乜街貨，叫伏勝喺6蚊樓下買番啲玩下。伏勝一向唔貪心，亦唔想喺高位接火棒，喺呢個位買貨嘅話，倒不如隔岸觀火好過，所以冇乜興趣。伏勝反而對保薦人做完呢單IPO後，會有幾多進帳非常感興趣，據伏勝所聞，保薦人做完呢單上市後，出年可以成年唔使憂，如果伏勝出年都可以執到單咁嘅正嘢嚟做，都咪話唔發。
伏勝