早兩星期《奇幻兵團LXG》1區碟殺落碟場，想睇但又冇中文字幕，大家恨得牙癢癢吧！好彩3區版終趕到上星期底聖誕檔推出；這班「奇幻兵團」全部特選於英國著名奇幻小說，電影場景布置得非常18世紀的老英國Style，加上全劇由頭至尾以全電腦特技包裝，感覺有如A級電影製作的「特攝英雄片」！暑期戲院上映時票房表現一般，相信好多人都因而Miss咗！但以極Grand場景加無限電腦特技放落一隻DVD度，感覺真係好抵睇！
記者：朱崇德
故事發生在1899年的老英國，一名邪惡的野心家──魅影，借助剛盟芽的「工業革命」的科技力量，發展出如坦克車及機關槍等殺人武器，並在歐洲各地四出作案，希望藉此在列國面前展現，軍警在他新開發的武備下的無力，從而大發軍火生意之財路！適值這時英國擁有一班奇能異士，政府就以特工Mr.M為首，集合7名當時得令的夢幻英雄，與這股惡勢力抗衡！
問香港年輕人《X-men》每個人嘅出處，佢哋可能逐個話到畀你聽，但呢班「奇幻兵團」就未必有咁嘅認知情度！點解佢哋個個「無厘頭」咁打得？呢個亦可能係戲院票房表現一般嘅原因之一！其實《奇幻兵團LXG》戲中所出現的怪傑，全部出身自英國經典奇幻小說，而且同《X-man》一樣，在1988年俾人改編成漫畫《怪傑同盟會》，將呢班差唔多同年代嘅人物，集合埋一齊！群龍之首──獵人艾倫，其實是出自《所羅門王寶藏》的經典小說，大家除咗在戲中知道佢有用獵槍百步穿楊的神技外，其實佢重擁有一個不死之身！吸血姬美娜，其實是《吸血鬼德古拉》中的女主角，戲中駕潛水艇的尼摩船長，是著名小說《海底兩萬里》的重心人物；可變身為9呎巨獸的傑克其實是《化身博士》，其餘如隱形士．士堅拿則是《透明人》！
講到戲中筆者最鍾意嘅人物，當然係007鐵金剛辛康納利所飾的獵人王啦！900碼外一槍中靶同不死之身極強，好似第2代《JoJo大冒險》嘅人設都好搶眼！另一搶眼人物係變形巨獸傑克，須知佢套9尺變形衫，足有5,900個組件，全由人手裝嵌，每次穿上都要花上７小時化裝時間，每一寸肌肉都可以由演員的動作而帶動，同真人完全無異！相對睇番香港拍嘅《大隻佬》，真係完全小巫見大巫！其他場景設定都好正！好似白色「海之劍」潛艇同奇幻號跑車，全白車身加銀色雕花！真係好Grand又有古英國夢幻Style！不過最激一幕，都係水雷勁炸水都威尼斯一幕！睇見一幢幢大廈倒塌，塵土飛揚，真實感十足！雖然後嚟睇番Disk2知道係用模型製作，但相對番日本嘅「特攝英雄片」，都唔知高出幾多班！
傑克呢個裝，每次拍片前都要動用7小時做準備工夫！而且身上每一條毛髮，都係每次逐條用膠水黐上去，想知難度有幾高，Making嘅化裝過程不容錯過。
戲中嘅尼摩船長，大家都覺得佢有啲印度人Feel，比較另類；但估唔到佢預備嘅潛艇餐都好特別！
《奇幻兵團LXG》新片落場，加勁強影畫，上榜首屬正路；《大隻佬》銷量一連兩周都好高，氣勢未見回落；韓片《與鬼同桌》由靚女全智賢擔大旗，病樣都一樣咁好賣，相信嚟緊港人投資拍嘅《野蠻女警》大家亦都期待度十足！《風之谷》dts靚聲版出奇地好賣，好多人都話之前已買過，不過聽朋友口碑唔錯，一樣都要買多隻！
資料提供
DVDPRO
電話：23326326
地址：旺角奶路臣街6E德發商場地庫B4舖
