賭王何鴻燊嘅四姨太梁安琪成立咗間多媒體公司後，呢輪正密鑼緊鼓搞一本自由行雙周刊，因為呢本雜誌係免費派發，創刊號會印十至十二萬本，𠵱家佢公司已經請咗四、五十人搞呢本雜誌，預計投資二千萬。
四姨太咁落本，睇嚟佢真係好有心想搞起間多媒體公司，聽聞自由行雙周刊成功嘅話，四姨太可能會再發展其他類型雜誌，佢似乎對傳媒業都好有興趣。
佢本自由行雙周刊預計農曆年開始出版，到時會有香港同澳門兩個版本，四姨太喺香港澳門都有生意，相信佢搞呢本雜誌，唔多唔少都會幫到旗下生意做吓宣傳，雖然呢間多媒體公司賭王冇份，但賭王背後就好支持四姨太搞呢本雜誌。
蕭正楠噚日去咗鑽石山，出席義賣曲奇活動。對於早前陳淑蘭唔見咗電話簿，蕭正楠就提議蘭子以後入電話可以用化名，就算下次再俾人執到電話簿，都唔會知道個電話號碼係屬於邊個嘅！
但係睇怕要打電話搵人時，連自己都唔記得佢係邊個，咁咪死火。
商台噚日喺新元朗中心舉行「叱咤樂壇生力軍展望日」，一班有份競逐生力軍獎項嘅新人2R、吳浩康、林一峰、Sky、Boy'Z等都有出席，2R喺台上準備表演嘅時候，Rosanne被工作人員拍打頭部，手上嘅咪高峯撞親個嘴，事後問Rosanne有冇撞傷，佢話：「冇，我撞到啲門牙啫！」
舒淇繼《千禧曼波》之後，明年又將會同侯孝賢合作新戲《最好的時光》，原來早排佢哋兩個已經再見過面，當侯孝賢話想再同舒淇合作嘅時候，舒淇即刻表示非常願意。聽講新片中舒淇會做五、六十年代桌球室嘅計分女郎，但至於幾時開拍，以及男主角究意係邊個，目前就重未決定。
陳冠希呢輪正忙緊錄唱片，英皇打算出年幫佢出碟，而最近就有雜誌話陳冠希會轉投EMI，經理人合約就由紅館公司同黃栢高嘅金牌公司共同擁有，噚日馮仁昭打電話畀紅館負責人，佢話：「冇咁嘅事，佢依然係英皇歌星，經理人約要同金牌公司瓜分就更加聞所未聞，陳冠希嘅經理人約只係紅館擁有啫！」
原本上月喺紅館舉行個唱嘅甄妮，因為同男友分手，要返美國療情傷，而將演唱會押後，點知後來甄妮同製作單位恒藝亞洲負責人丘亞葵鬧意見，搞到演唱會幾乎搞唔成，但馮仁昭聽聞甄妮同丘亞葵已經傾掂數，出年五月喺紅館開三場。不過，甄妮重會唔會搵番西城秀樹做嘉賓，暫時重係未知之數。
