四圍同人講話要起港珠澳大橋，可惜重十畫未有一撇嘅胡應湘，就快有新任務，政府已經刊憲，委任佢做城大校董會主席，明年一月起生效。其實哥頓已經做咗理大校董會主席六年幾，今次過檔去另一間有理工底嘅大學，對於哥頓，做城大校董，始終冇論政咁生手。
據講，哥頓今次係接替將會退休嘅梁乃鵬，不過梁主席今年六十二歲，比起啱啱過咗六十八歲生日嘅哥頓後生幾年，哥頓重肯繼續捱，可見佢老當益壯，睇佢平時郁吓就鬧人，就知佢好火。
哥頓喺港珠澳大橋事件同李嘉誠面左左，搞到小超人李澤鉅要離開哥頓間合和實業嘅董事局，不過，日後哥頓入到城大校董會，又有機會同姓李嘅人交手，呢次就係小小超李澤楷喇；大橋爭拗，因為要問過廣東省，特區嘅闊佬恩怨可以暫時化解，相信唔會影響佢哋嘅合作。
哥頓喺理大個校董會主席位就由科技園主席羅仲榮接任，羅主席搞電池出身，相信對理大嘅科研會有一定鞭策作用。
傳真︰2623-9278
電郵︰