喺「拆禮物日」慘敗給查爾頓二比四嘅車仔，油王阿巴莫域治當然對車仔成績唔滿意，已經蓄勢要展開第二浪收購球星行動，據聞祖記前鋒查斯古特係下個獵物，而且重有啲成事迹象㖭。
消息指油王已經列出收購前鋒清單，當中重包括國米嘅韋利、拉素嘅哥拉迪同阿積士嘅伊巴謙莫域，查斯古特身價係二千五百萬鎊（約三億四千四百萬港元），而盛傳佢亦喺聖誕假好神秘咁去咗美國，連祖記都唔知佢行蹤，另外佢亦曾講過，會以私人理由離開意甲，唔通今次真係有計？
雖然聽聞祖記唔多想賣走查斯古特，但係祖記自從兩年半前放走施丹後，都冇乜賣球員，喺一定唔放走歐洲足球先生尼維特嘅情況下，咁睇查斯古特真係有機會做藍戰士嘞。
拜仁前鋒辛達告魯斯最近生咗個囝囝，結果多咗個「小前鋒」，成全咗一支拜仁BB隊，點解？原來連同「足球皇帝」碧根鮑華嗰個兩個月大囡囡，以及另外九個現役拜仁球員近一年嚟出世嘅BB，剛剛可以組成拜仁BB隊，話唔定將來呢啲BB，統統變成拜仁主力，幫呢支班霸建功立業呢！
雖然世界盃外圍賽重有排先開波，但中國足協提前做準備，諗住派小組到中東睇同組勁敵科威特喺海灣盃嘅表現，刺探吓軍情，並要求科威特足總協助盡快辦理簽證。點知辦證方面依然繁複，唔知趕唔趕得切二十九日對阿聯酋，我求大俠估唔到兩國咁快就大玩「間諜戰」。
喺噚日美國聖誕日，NBA嘅德州雙雄侯斯頓火箭同達拉斯小馬可謂威到盡，兩隊唔單只齊齊贏波兼贏盤，帶挈波友聖誕發財，更厲害嘅喺，佢哋喺作客全聯盟主場戰績最勁嗰兩隊波─湖人同帝王，兩隊開鑼至今喺主場只輸過一場，但今次勢估唔到竟然齊齊俾德州雙雄打冧。