最近有調查報告指出，香港人的IQ全世界最高，可能香港「人傑地靈」，所以住在這裏的人都特別醒，但勢估唔到，住在香港的狗都會特別「資優」。大家見過會倒立的狗嗎？呢隻只有十個月大的小貴婦狗，外表趣致又醒目，識得服從主人之餘，重會做好多你十個月大時都一定唔識做的事，唔信？即刻show畀你睇。
記者：張一豪
攝影：林栢鈞、梁翠妍
阿良教狗心得
絕對唔打得
原來教狗是要循循善誘，打得多，正所謂「趕狗入窮巷」，反而會挑起牠們的反叛心，在狗主面前「死狗」一樣，但背後就做出一些反叛行為，小則隨處便溺，重則有時甚至會傷害他人，所以教狗前先要了解牠們的性格，別以為動不動打鬧，牠們就會聽話。
醒目貴婦狗Nikkie的主人阿良，本身開狗店，亦是香港狗會「服從委員會」成員，所以相狗別具慧眼。「Nikkie出世三、四個月嚟到我舖頭，已經特別精靈活潑，成日要人同佢玩，好得人鍾意，嗰陣我已經睇得出佢係一隻『資優狗』，後來佢畀人睇中，賣咗出去，不過佢前主人本身養咗一隻大型狗，大細玩埋一齊，好容易整親隻細嘅，佢怕照顧唔到，養咗一個月左右，就送Nikkie返嚟，最後我決定自己養番佢。」
Nikkie十個月大已做到好多令人驚歎的動作，唔只識「Hand」、「Sit」咁簡單，就連坐同跪都識，最令人驚奇，就係識得倒立。「Nikkie細細隻嘅時候，已經企得好好，到佢五個幾月大，我開始訓練佢，第一個動作就係教佢企，點知個幾月後佢真係學識，慢慢重一步一步咁學識行，𠵱家要佢企喺度用雙腳行路，一啲都難佢唔倒。」
既然咁快學識企，自然要挑選更高難度的動作。「Nikkie身體比較短，所以平衡方面特別好，所以我決定試吓教佢倒立，如我所料，佢真係做到，呢樣嘢唔係隻隻狗都得，所以我都為佢自豪。𠵱家佢可以倒立行到幾步，平衡上應該可以更好，加緊訓練的話可以做到更多動作。」阿良𠵱家重教埋Nikkie踩滑板，雖然尚未成功，但相信只係時間問題。
深諳教狗之道的阿良話，訓練狗隻服從不單止為了參加狗展，最重要係同佢哋溝通。「愈聰明嘅狗就愈活躍，有時可能畀人感覺好頑皮，甚至佢哋吠嘅時候，會令人以為好惡、唔友善，其實佢哋只係想引人注意，唔教佢哋又或者唔識教，就會對人做成滋擾，引致不必要嘅誤會。」今天（27日）下午三時Nikkie會同佢班狗朋友到屯門時代廣場表演，想見見Nikkie同埋會跳舞的邊界牧羊狗，別錯過今天的機會了。
