今年聖誕節市面一片興旺，人人喜氣洋洋，惟獨一月一號「還政於民、改善民生」元旦大遊行嘅搞手心情忐忑，事關擔心大家玩到個心「創」晒唔去遊行，民主黨噚日就廣發e-mail提醒市民上街，而天主教正義和平委員會星期一就會喺報紙登廣告，呼籲教友一月一日下午三點維園再見。
民間團體千方百計動員市民上街，有官府中人則同八方講，市民對遊行未有反應，主因係全香港最有「號召力」叫人上街位仁兄重未出招，佢話若然特首辦今日宣布委任區議員名單，而名單入面又係熟口熟面嘅保皇黨人物嘅話，咁元旦日又有好戲睇。
官府中人又話，委任區議員名單早就交咗畀老董，之不過當中有啲名字唔多合老董心水，令委任名單幾上幾落，噚日都未有最後版本，隨時今朝早先拍板，貫徹老董議而不決，決而不行嘅獨特作風。當然呢單嘢唔係冇限期，點拖都要喺元旦前面世。
老董倒行逆施繼續委任區議員令市民反感，但原來被委任者亦諸多不滿，一名聲稱「候任委任區議員」人士咁講：「等咗成個月都未搞掂，嘥咗我個聖誕假期。」
傳真︰2623-9278
電郵︰