踏入秋冬，特別容易出現傷風、鼻塞、咳嗽呢類感冒病徵，就算筋肉人咁大隻都唔能夠避免。雖然，呢類小毛病唔會死人，但有嘅時候日子真係幾難過。
最近睇過一個健康網頁，入面介紹幾種感冒「自」療法，筋肉人試過都幾使得，所以想同大家有「福」同享。
秘方一，如果患一般感冒，最重要當然係休息；其次就要每日飲八杯水，因為充足水份可以避免鼻腔、喉嚨乾燥，同時又有稀釋痰同鼻涕作用；至於咖啡、茶、可樂同酒呢類脫水飲品就千萬唔可以飲，否則愈飲愈多痰。
遇到鼻塞流鼻水時，推介嘅秘方二認為，抹鼻涕會刺激鼻孔，所以要溫柔啲；另外可試試到沖涼房開熱水花灑，呼吸濕潤蒸氣，可紓緩鼻塞引致不適。同時，唔好長期依賴鼻塞噴劑，因為會容易上癮或引致慢性鼻膜炎。
秘方三主要針對咳嗽，首要係遠離二手煙；遇到乾咳時，可以飲用檸蜜滋潤喉嚨；至於夜咳導致失眠，不妨墊高枕頭，等頭部抬高後可以幫助呼吸。
當然，以上秘方只係等有病時可以舒服些少，俗語講「病向淺中醫」，有病就一定要睇醫生。
文：筋肉人
電郵﹕