眾人媽打兼前港督麥理浩契女李麗娟（圖）呢個聖誕新年唔外出，除咗區議會委任議席關佢阿姐事，唔敢走開，佢個仔同個妹李桂蘭都返咗嚟香港，所以就留港度假。
當然李麗娟最緊張同沙士孤雛嘅約會，包括過幾日去CyberPortBBQ，不過，由於佢哋都唔想俾人打擾，所以唔會安排記者參加，對於不幸喺飛機惹到沙士身故嘅朱律師，李麗娟都深表同情，佢話朱太早前可能擔心同兩個女兒返美後就攞唔到教育基金試過好唔開心，其實唔會，有關人士已經跟進緊。至於沙士後遺症出現骨枯症狀嘅人士，佢相信身受其害嘅馮康一定會幫佢哋忙。
香港人真係聞沙士色變，二○○三將盡，但願一切嘅衰氣隨風而逝，八方最支持立法會查沙士，因為只有人人都肯講出事實真相，唔怕有人秋後算帳，香港先至可以真正經一事，長一智，唔畀無能官僚側側膊。
傳真︰2623-9278
電郵︰