從林光如轉述厲以寧教授嘅「佛寺賣梳」故事，知道做事要成功，一定要動腦筋，去嘗試，唔好下下話：「賣梳畀和尚？點會得呀，唔好嘥時間。」好多事情，唔試過，點可以武斷，預先話唔得？青年人出嚟做事，凡係碰到老闆有古靈精怪嘅「號令」，千祈唔好即刻回答：「未必得噃，老細，好多不利條件，唔少困難㗎！」老細聽到呢句話，有七成機會炒你魷魚。
想落讀完書，到社會做事，首先做推銷員，係一個好好嘅訓練，第一、教你知道求人之難；第二、唔逼你，你點學習口才，如何打動對方；第三、令你處處從他人角度思考，如何利己利人，因為靠呃靠滾，專門利己損人嘅推銷方法，好快就令自己信譽破產，冇得撈。有呢三方面嘅思維與技能，已經成功一半啦。
有一次問肥佬黎：「你十零歲出道至今，最懷念乜嘢經歷？」肥佬黎話：「廿零歲喺紐約推銷成衣，逐家公司去拍門，逐次俾人踢出門口，正是屢戰屢敗，但又屢敗屢戰，喺過程中識咗好多人，知道客人嘅口味需求，知道有錢買貨嘅人如何奄尖腥悶，於是領悟咗如何講究品質、市場需求……呢啲經驗非常寶貴！」
左丁山細個時冇肥佬黎咁慘（或者因為咁，到𠵱家亦都冇佢咁發），但初出道時亦曾做過推銷員，即係銀行貸款主任，專係推銷貸款，送銀紙出街。唔好以為好容易，講掂一個好客（即身家厚，信譽好）幫銀行借錢，係非常艱難之事。呢啲經驗，正好磨滑自己把口！