賭王何鴻燊胞妹十姑娘個仔，即係陳復生個老公麥舜銘，最近被傳佢同落選港姐水明琪來往甚密，上星期二晚有狗仔隊發現佢哋夜麻麻行香港公園㖭。
唔少人都好關心呢單八卦新聞，噚日圈中忽然有傳陳復生同麥舜銘聖誕節凌晨兩點幾喺佢哋嘅半山愛都大廈寓所嗌大交，搞到有人報警兼叫白車到場。
馮仁昭跟住打去警察公共關係科了解，但佢哋話平安夜晚至聖誕凌晨，冇接過有人喺愛都大廈報警求助嘅電話喎！
後來馮仁昭個老友終於搵到陳復生本人問個究竟，佢聽到之後哈哈大笑，話平安夜嗰晚佢同個仔喺屋企，第日聖誕節就成家人出街食飯，講多幾講麥舜銘重搶咗個電話嚟聽㖭，老友話聽落真係唔覺佢哋兩公婆有乜唔妥！
蔡依林嘅歌曲《看我72變》成為台灣飛碟電台「幽浮勁碟排行榜」嘅年度十大金曲之首，另外一首歌《說愛你》亦得到第六名，噚日佢去頒獎禮時，出場嘅配樂竟然係緋聞男友周杰倫嘅歌！緋聞咁樣俾人擺上枱，唔知蔡依林好嬲定好笑呢？
趙學而噚日喺將軍澳拍攝《皆大歡喜》，學而話聖誕節去咗內地登台搵銀，咁佢咪冇時間陪男友囉？學而話：「我連佢送嘅禮物都冇時間拆。」學而近排重同謝天華買咗同款手提電話，兩個四周圍影人相，重唔搞笑唔收貨㖭！佢哋咁啱key，唔怕傳緋聞咩？
組合Boy'Z噚日BoxingDay去到紅磡都會海逸商場做表演嘉賓，講開前晚聖誕節，佢兩個就去咗霍紋希屋企開party，關智斌（Kenny）話：「一齊燒嘢食同打麻雀，重玩話事啤㖭，點知輸咗，就俾人罰我舔乾淨地下啲茄汁，真係好核突。」
曾志偉前晚參加明星足球隊嘅聖誕舞會，佢話呢個ball停辦咗四年，但因近排發生太多唔開心嘅事，所以重辦沖喜吓。志偉話已經搵咗老闆開拍紀念柯受良（小黑）嘅劇集，小黑嘅大仔柯有倫做主角。另外，出年會喺上海舉辦一個紀念小黑嘅演唱會，譚詠麟、陳慧琳同任賢齊都應承出席。
