名作家倪匡（原名倪亦明）同妹妹亦舒（原名倪亦舒）雄霸香港小說市場，一個一手帶起衞斯理科幻小說熱，另一個寫家明與玫瑰寫到街知巷聞，估唔到佢哋細佬倪亦靖雖然做唔成文學家，卻成為工程師，重係新加坡國立大學教授，最近因為一項人工智能同產品生產結合嘅研究，獲《國際生產研究雜誌》頒發嘅NormanDudley獎。
呢位倪亦靖教授，喺七兄弟姊妹中排行最小，佢話雖然好崇拜阿哥同家姐喺文字工業界咁巴閉，不過大家各有各忙，好少聯絡。
倪教授最近接受新加坡《聯合早報》訪問，話倪匡同亦舒每年只會寄兩三封信畀佢，佢重舉例話，曾經收過亦舒一封信，打開一睇，只有「年中問候」四個字，連埋署名，之外就乜都冇寫。
倪氏重有個大佬喺大陸，亦係工程師兼資深共幹。倪匡個仔倪震，二十幾歲搵夠上岸，𠵱家係電台節目主持人，遲吓做埋話劇。
傳真︰2623-9278
電郵︰