一直走豪華房車路線嘅豐田Crown，已經歷咗多次變革，並一直廣受用家歡迎；然而，響踏入2004年之前，廠方就為其推出全新第十二代型號（但暫時只有CrownRoyal及CrownAthelte型號），不但外觀變得富年輕活力感外，全新引擎配搭亦能為車子帶來更好力、更慳油嘅性能表現。
豐田廠方為新一代Crown，安排有全新GR系列嘅V6引擎作配搭，當中包括有2.5公升型號（馬力215ps/6400rpm，扭力26.5kgm/3800rpm），同埋頂級版所配用嘅3.0公升偈（馬力256ps/6200rpm，扭力32.0kgm/3600rpm），匹配一套5前速或6前速自動波箱，性能表現可謂毋庸置疑；懸掛系統亦經過廠方強化改良，加上剛度十足嘅底盤配搭，行車循迹性亦因而較前增強不少呢！
經歷咗十一代嘅變化後，響大家眼前嘅第十二代新款Crown，造型明顯擺脫咗原有成熟穩重嘅包裝，取而代之嘅，會來得年輕化嘅造型，其中圓渾流暢嘅車身線條，響屬全新設計嘅頭燈、鬼面罩及尾燈襯托下，最能將呢個特點展露出來。
另外，由於新車尺碼有所增加，其中軸距達2850mm，加上前後兩排承托力甚高嘅高級真皮座椅，乘坐舒適度較前提升不少；設備配搭又見齊全，除中控台上有齊高級音響、原廠恒溫冷氣連後排冷氣送風口外，後排中央手枕更備有各設備嘅控制鍵，另外重有電雪櫃等配備，從而令享受程度更上一層樓。
