杜汶澤前晚同吳君如喺尖沙嘴新世界中心出席《阿金陪你過聖誕》，宣傳電影兼倒數過聖誕，吸引近四百名市民圍觀，大會搵咗好多贊助商，包括飲品、眼鏡同避孕套，所以現場有啲打扮成精子咁嘅人行嚟行去，最好笑嘅係阿澤着到一身白色同戴住頂白色冷帽，同現場嘅精子好似樣。
原來阿澤有避孕套商贊助，免費用到六十歲，佢同君如倒數完，重一齊大叫：「啱啱過咗平安夜，大家平安，大家用杜蕾G一定平安。」
阿澤話：「唔知舊年定前年開始，唔知乜事就贊助我囉，我都好𢱑頭㗎。」問佢用咗贊助商幾多箱避孕套，阿澤笑住話：「邊數到呀？但我知市場調查話，平均每人每個月要用六個，一年就應該有七十二個。」阿澤一個星期都唔止用六個嘛？佢話：「𠵱家邊有啫？都冇時間用啦，又唔係後生嗰陣。」咁講即係佢後生時一星期用超過六個避孕套啦，哈哈。
吳君如前晚去倒數時，因為尖沙嘴太多人，有五個警察幫佢開路，行咗二十分鐘，佢話覺得好威喎，倒數完畢後，男友陳可辛唔知喺邊走咗出嚟帶佢走，似乎兩個重有節目喎！
日前有位成都嘅已婚商人，自稱被楊恭如嘅水汪汪雙眼迷倒，佢知道心儀嘅女神喺呢個月二十八號會去成都一間酒樓演出，所以佢想請恭如食一餐三萬蚊人民幣嘅豪宴，重話自己已經落咗一萬蚊定金，但恭如知道後即刻推都推唔切，梗係啦，食完佢餐飯重唔俾人講足一世咩！
梁小冰同老公陳家輝噚日出席上水《人狗共舞CatwalkShow》，小冰話兩公婆好忙，家輝㩒住佢唔畀養小動物。問到佢婚後造人計劃，小冰話：「呢個問題唔識答，遲啲先喇！總之出年都唔會，無限期押後。」講到咁肯定，睇嚟今次輪到佢㩒住家輝啦！
趙薇三年冇出過唱片，佢噚日出席喺成都舉行嘅《玉觀音》首映時，透過經理人陳蓉話畀記者知，已經錄緊新歌，亦都同Sony唱片公司傾緊合約，陳蓉話冇預算趙薇幾時出唱片，最緊要啲歌做得好，佢哋𠵱家搵嘅，全部係內地最頂尖嘅音樂人，睇嚟趙薇今次都真係好大決心做歌手喎。
徐子淇噚日出席大埔「飛躍翻騰聖誕Show」，同現場觀眾玩遊戲，點知有位男觀眾玩得太過投入，唔覺意碰到子淇心口同個肚，而子淇重要玩晒倒吊咁，事後問到子淇會唔會覺得好尷尬時，佢話尷尬就唔覺得，但係早知咁玩法嘅話，佢就唔會好似噚日咁着背心仔出現喎。
