爆機狂迷：史上最靚<br>《SonicHeroes》靚聲靚畫踩入XBOX

爆機狂迷：史上最靚
《SonicHeroes》靚聲靚畫踩入XBOX

Sonic超音鼠一直都係SEGA嘅招牌角色，憑住佢獨有超音速威力，每次都為機迷帶來驚喜，今次更走上XBOX，推出新一集嘅《SonicHeroes》，更特別拉隊召集齊多個《Sonic》系列，合共超過12個角色，各自擁有不同嘅專長本領，喺遊戲中大展所長，過關斬將，玩法更突破傳統，令人耳目一新。
記者：許福合

遊戲類型：動作
對應機種：XBOX
遊玩人數：1至2人
開發商：SonicTeam
推出日期：12月30日
行貨售價：$399

■Sonic

■Knuckles

今集《SonicHeroes》人氣高漲，非常熱鬧，一共會有12個外形有趣嘅角色登場。主角Sonic依舊速度驚人，凡飛躍、高躍或攻擊敵人都最拿手；象徵力量嘅Knuckles，憑住驚人怪力，喺遊戲中可將大石等障礙擊碎；另一個好拍檔Tails嘅力量雖然唔及其他角色，不過擁有兩條尾巴，可當作螺旋槳飛行。各主角皆有唔同特色，3人一組分成4隊展開冒險，各隊都有不同任務同版圖，連CG都各有唔同，而且憑住XBOX硬件機能，畫面非常出色，毫無疑問係有史以來最靚嘅《Sonic》。



轉換戰鬥組合
保留《Sonic》精髓嘅同時，《SonicHeroes》喺玩法上都有新突破，唔再係以往各自為戰，以3人小隊為單位，一味向前衝只係低手玩法，高手就要考慮到角色喺速度、力量同飛行能力，以TeamSonic為例，當趕時間或執金環嘅時候，應以Sonic行先，搵唔到出路時，轉用Knuckles就分分鐘可以撞出生路，至於Tails就可帶住小隊飛山過海，喺適當時間轉換戰鬥組合，就係《SonicHeroes》嘅至勝關鍵。

■場景設計得相當唔錯，值得一讚。

■對付敵人嘅招數各有唔同，有時可以從電視機得到提示。

■由Sonic領軍時，行走速度一流，狂奔後甚至會留下殘影。



2人對戰Mini-Games
近期遊戲好興加入2人對戰嘅Mini-Games，今次《SonicHeroes》嘅Games仔都好出色，仍然係3人小隊嘅戰鬥模式，以最快到達終點就勝出，有多個唔同版圖，玩法各有特色，最正係BingoHighway，會走入一個超大型波子機，喺裏面彈來彈去，非常過癮，主要考驗玩家眼明手快，不過最頭痛係轉換視點之後，難以分辨方向，不知不覺會走番回頭路，若一個唔留神跌出跑道外，就要由起點重新開始，所以切記小心走路啊！

■BigtheCat揸住把遮就識飛，睇身形真係估唔到。

■每個小隊都有飛行高手，要好好利用啊！

■Knuckles攻擊力一流，打大佬最啱用。

■SeasideHill版要爬上爬落，要好好利用飛行。

■另一個跑道設於高空，一跌出去就要由頭開始。

■喺波子機內周圍彈，小心控制方向。




XBOXHK香港客戶服務專線：800964215

■Tails

■左起：AmyRose、BigtheCat、CreamtheRabbit