呢排俾民建聯同教統局局長李國章玩到陀陀擰嘅科大校長朱經武，終於有機會唞一唞，遠離香港呢個是非之地。
朱校長早排好敢言，對於民建聯忽然陣前倒戈，話唔支持減大學經費，令大學下年撥款申請受阻之後，朱經武公開話，如果有政黨以大學撥款作為爭取選票嘅工具，將教育政治化，令人遺憾。
咁又係，啲大學校長一早已經無奈接受明年嘅減幅，點知經由政黨阻一阻，朱經武當然擔心下年嘅財政安排會被拖慢。原來朱校長一早計劃好，聖誕假期會同埋老婆及專程由美國來港嘅仔女，一齊去天津探望外父、數學大師陳省身。唔知呢次橫生枝節，會唔會影響到佢嘅行程呢？朱校長話，香港明年經濟好轉係佢另一個聖誕願望。
傳真︰2623-9278
電郵︰