近來鬼咁多人話，社會唔應該太過「政治化」：大學撥款唔好政治化，經濟民生又唔好咁政治化，但其實，喺中港台呢個騎呢鐵三角共榮圈，打個乞嗤、擤篤鼻涕，都有政治，煩都煩死人。
前日飛虎隊生擒季炳雄，警察建功。阿董就黐埋去警察總部，搶做攝石人，叨光攞分，好似渡船街活捉賊王嘅行動，係阿董一個人喺嘉慧園孭晒成身電子通訊儀器做總指揮咁款。以前殖民地時代，警察夠一樣做嘢，雨夜屠夫林過雲落網，幾時見過港督笑騎騎伸埋個頭出嚟搶鏡領功？嗰陣時政府威望高，𠵱家阿董就要飢不擇食，點解？咪因為一個弱勢政府，空前政治營養不良，見到樹皮草根，都要執起嚟係咁質落口囉。
喺北京，中國國家主席胡錦濤無喇喇見台商，叫佢哋幫手抑制台獨。大佬呀，開講有話「商人無祖國」，台商去中國做生意，只諗住一樣嘢，就係賺錢，台獨唔台獨，關人叉事。台商反而應該當面勸吓老胡：唔好咁躁，有事慢慢講，千祈唔好講打講殺，郁吓就話武力攻台，應該認真學習吓布殊總統見溫家寶「反對中台單方面改變現狀」嘅講話精神，和平、寬容、博愛，迎接新嘅一年。
成個大氣候都咁政治化，中國外交部駐港機構又點會唔表態，又例牌叫「外國勢力」唔好咁多嘢噏。呢番說話，擺明就係針對英國外交次官韋浩明，同埋美國駐港總領事祈俊文。佢兩個都仗義執言，話希望見到香港早啲普選特首，民主政制有更大發展。兩位外賓咁講，有乜嘢錯。英國身為中英聯合聲明簽署國，有責任繼續監察聯合聲明執行狀況，直至二○四六年香港改行共產，正式納入中國母體為止。唔出聲，先至係失職，會受到國際社會譴責。二○○七年普選特首，連親中政黨民建聯都支持，可謂人同此心，心同此理，中國政府緊張啲乜？怕選咗「東方哲古華拉」長毛出嚟，
香港呢個城市，打開門做生意，食四方飯，有份喺香港投資嘅，由中英美日到印度巴基斯坦，都有權就香港政制前途發表多啲意見，畀香港六百萬市民廣為參考，因為呢一樣涉及香港嘅營商環境。
至於海峽兩岸問題，亦唔係香港人份內事，不過特區政府及市民，包括阿董、民建聯，反而要旗幟鮮明大力反對兩岸三通，因為兩岸三通咗，台灣佬資金直接入大陸，冇人再會利用香港呢塊濕腳地氈做中介港，冇咗班台灣佬吱吱喳喳咁過境，香港嘅生意會死晒。呢一樣就叫做香港人切身利益。阿董同民建聯有冇膽，喝住台灣嘅連戰宋楚瑜，叫佢哋萬一上台之後，顧住香港人碗飯咪亂嚟？
傳真︰2623-9278
電郵︰