民政事務局局長何志平同夫人胡慧中，噚日冇去教堂唱聖誕歌，反而一齊參加元朗十八鄉大樹下天后古廟重修竣工嘅開幕禮。
間廟重修後美輪美奐，但最吸引胡慧中嘅，係古廟旁邊嘅百年大榕樹。佢走埋棵樹度，一邊摸，一邊同記者開玩笑：「快啲摸，摸吓會長命百歲！」有記者問佢，想唔想生番個仔。佢隨口話，「點只想呀，重唔止生一個㖭！」隨即不停咁笑，跟住又話，「想吓就有，咁想吓咪發達？」
十八鄉附近就係山貝河，胡慧中諗起最近經常喺山貝河出沒嘅鱷魚仔：「鱷魚專家喺度，條鱷魚仔就唔出嚟，專家走咗就出嚟玩。呢度咁近元朗，真係想探吓佢。」結果，佢同何局長食過盆菜後，冇去睇鱷魚，話要返屋企同個女玩。
傳真︰2623-9278
電郵︰