新車速報：<br>新版瑪莎拉蒂Quattroporte徹底變革

新車速報：
新版瑪莎拉蒂Quattroporte徹底變革

瑪莎拉蒂（Maserati）車廠繼於較早前，推出Coupe及Spyder等新車款後，最近又為旗下嘅Quattroporte四門豪華房跑車，推出新一代型號；新車無論造型、車廂，以至係機械配搭皆屬全新組合，表現明顯較前來得出色。雖然率先抵港嘅屬左軚型號，但今日不如一齊嚟先睹為快，睇睇新車有何吸引力啦！

記者、攝影：何永仁

若要數近代車壇嘅經典車款，相信一定唔少得瑪莎拉蒂Quattroporte及Ghibli一份兒，皆因兩者無論造型以及性能表現，都令人對其留有深刻印象；其中前者更以實用嘅四門房車形象示人，難怪廠方表明Quattroporte係一部糅合跑車高性能表現，同埋房車實用性於一身嘅車款啦！



全新造型　顯現魅力
上一代Quattroporte係以方匣子形象示人，望落好有一份成熟穩重嘅感覺；但大家眼前呢部新一代型號，卻予人耳目一新之感。新車改用流線形車體設計唔在講，響一對炯炯有神嘅頭燈，以及帶有家族Feel嘅鬼面罩襯托下，一份叫人難以抗拒嘅魅力油然而生；恍如跑車般嘅車尾線條設計，亦具有一定吸引力，而直立式尾燈鋪排簡潔易讀之餘，四出式跑車尾喉配搭，更可讓駕駛者感受到引擎雄渾嘅咆哮聲呢！

■一對明亮頭燈襯以闊大鬼面罩，望落吸引力十足。

■四出式排氣喉組合，引擎呼吸因而變得暢順。

■直立式尾燈鋪排井然，閱讀方便又清晰。

■氣派十足嘅全新車廂布局，絕能惹人好感。

■中控台除設備齊全外，另有桃木裝飾作配襯，貴氣十足。

■後排備有冷氣送風口，享受程度更高。

■首飾箱容量高之餘，上方重貼有Quattroporte徽章。

■前排椅背備有活動桌几，實用度高。

■前後兩排座椅以高級真皮鑲嵌而成，加上闊落空間，乘坐倍見貼服舒適。


車廂布局　氣派十足
由於新車嘅車身闊度及軸距，分別達1895及3064mm，故此可為車上乘客營造出一個寬敞闊落嘅車廂空間，再加上前後兩排以高級真皮鑲嵌而成，兼有頗高承托力嘅座椅，乘坐妥貼舒適，當然唔少得重有車廂四周嘅瑰麗桃木裝飾，以及前排椅背附設嘅桃木餐桌啦！
至於設備配搭方面，除電窗、電鏡及電天窗外，一體化及有桃木作裝飾嘅中控台上，更有齊高級音響及原廠恒溫冷氣，兼且鋪排得簡潔有序，用落倍見方便容易；然而，三幅式真皮軚環上，除備有音響等設備嘅遙控鍵外，更備有排檔桿，轉換波檔從此變得更輕鬆。

■三幅式軚環把持感十足，還備有排檔桿，轉換波檔變得輕鬆方便。


4.2V8偈　輸出強橫
全新瑪莎拉蒂Quattroporte另一個惹人注目嘅地方，相信會係佢所配用嘅嗰台4.2公升V8DOHC引擎，呢台引擎不但擁有高達400匹馬力輸出外，46.0kgm扭力峯值更於4500rpm時發出，匹配一套6前速半自動波箱，無論起步加速，表現同樣來得敏捷有勁，難怪新車0至100公里加速度僅為5.2秒，而極速更可高達275km/h咁快啦！
另外，廠方不但為新車安排有跑車化懸掛組合，以及由Brembo提供嘅高性能制動器外，另外更備有多套電子系統，如MSP（MaseratiStabilityProgram）、ABS、EBD及ASR等等，從而令新車嘅操控及制動表現，皆予人十足信心呢！



瑪莎拉蒂Quattroporte規格
引擎：4244ccV8DOHC
馬力：400ps/7000rpm
扭力：46.0kgm/4500rpm
傳動：6前速半自動波，後輪驅動
懸掛：（前）雙搖臂（後）雙搖臂
制動：（前）透氣碟（後）透氣碟（ABS）
輪胎：（前）245/45R18MichelinPilotSport（後）285/40R18MichelinPilotSport
尺碼：5052×1895×1438mm
軸距：3064mm；車重：1860kg
0-100公里：5.2秒；極速：275km/h
平均耗油：18.9L/100km
新車售價：約港幣200萬
查詢：快意汽車（26278939）

■藍底表板布局閱讀清晰容易外，中間重有行車資料顯示。

■一套6前速半自動波箱，不但能讓引擎發揮至極，更可有操控手波車嘅快感。

■新車一台4.2公升V8偈嘅強悍動力輸出，實在叫人一試難忘。

記者評語：氣派十足表現狠勁
新一代瑪莎拉蒂Quattroporte用上圓渾車身線條示人，響一對頗有神氣嘅頭燈襯托下，倍見魅力十足，就連車廂布局亦見豪邁富氣派；然而，一台4.2公升V8偈嘅強悍動力輸出，更叫人一試難忘呢！

■尾廂容量甚高，地台下更備有隱蔽式雜物匣。