真估唔到，喺香港冇睇過林光如嘅文章，反而從泰國《星暹日報》見到轉載。林光如係上市公司「星光」嘅老闆，「星光」從事工業印刷業務，由小做到大，係林光如一手一腳，踏實經營嘅成果。
《星暹日報》轉林光如講故事，林光如就話係中國著名經濟學家、全國政協經濟委員會副主任厲以寧教授講嘅。故事係講去和尚寺推銷木梳。第一位推銷員空手而回，因為和尚冇頭髮，要梳嚟做乜？呢位推銷員老實到毫無想像力，好難升級；第二位推銷員說服和尚買梳刮頭，增強血液流通，賣咗十幾把，可說嘴頭搭夠，唔理有無成效。第三位較有觀察力，亦有口才，講掂佛寺買幾百把梳，擺喺度畀上香善信梳頭，讓佢哋整理頭髮，除去香灰。第四位最有諗頭，亦懂包裝，說服佛寺購買大量梳子，每位上香客送一把，梳子上面刻上佛寺對聯（有紀念性），另一面刻上「吉善梳」三個字，上香客人人喜歡攞一把，添香油添得開心，於是形成三贏局面，推銷員贏訂單，長賣長有，佛寺做咗最好嘅公關，善信攞番一件有紀念性禮物。
林光如作為工業家，知道推銷嘅重要性，如何訓練推銷員嘅思維與想像力，係每一間公司嘅主要議題。考推銷員如何到和尚寺賣梳，真係絕橋也。左丁山將故事再講一次，就係想廣為傳播，就係希望多啲人知。