張栢芝前晚與譚詠麟及李克勤等一班環球歌手在尖沙嘴，與過萬市民倒數迎聖誕，她表示欲欣賞王菲演唱會，又謂與前男友謝霆鋒是好朋友，覺得王菲霆鋒很恩愛，不相信二人分手。
張栢芝、譚詠麟（阿倫）、李克勤、黃伊汶及余文樂等一班環球歌手，前晚在尖沙嘴出席「廣東道聖誕StreetParty」，與逾萬名市民一同倒數，迎接聖誕。開場全體大合唱後，每位歌手都輪流獨唱，但栢芝表演後只得零星掌聲，反應冷淡，她在現場除與克勤及阿倫聊天外，沒有跟其他歌手交談。而最受歡迎的是左麟右李，他們演唱時更跑落台四圍走。
栢芝接受訪問時，提到將參演陳凱歌新片《無極》，會與前男友謝霆鋒合作，她說：「我只會將部戲拍好，其他嘢唔會理，只要焦點放喺戲入面，我就唔介意同佢合作，我唔想啲報道將我同霆鋒放埋一齊，令到電影主題唔見咗。」問栢芝會否去欣賞王菲演唱會，她說：「我未睇，都想去睇，阿菲係我好欣賞嘅歌手。」
提到阿菲與霆鋒已分手一事，栢芝謂：「我直覺唔信囉，我覺得佢哋好恩愛，我睇好佢哋嘅感情。」阿菲演唱會負責人邱王黎寬得悉栢芝這番話後表示：「叫栢芝唔使諗咁多，要嚟睇就嚟，我哋都會邀請佢。」
栢芝表示她○三年過得很快樂，沒有失去任何東西，至於今年她與小春及霆鋒的緋聞傳個沒完沒了，栢芝說：「我唔理人點講，佢哋都係我好朋友。」
栢芝在台上被司儀問到最想與哪位歌手合唱，她說：「女仔我揀黃伊汶，男仔就余文樂，我同佢哋外形都好襯。」
此外，阿倫被問到是否捐二十萬予柯受良喪禮？他說：「係成班朋友捐筆錢出嚟，唔止畀小黑，重有一個人。」問他該人是否蔡國權？阿倫笑着默認。
採訪：王連連 攝影：陳偉權
